ڪراچي ۾ نئين ضلعي ٺاهڻ تي سياسي پارٽيون سنڌ حڪومت تي ڪاوڙجي پيون

سربراهه پاڪ سر زمين پارٽي سيد مصطفيٰ ڪمال سنڌ ڪابينا جي ڪراچي ۾ ستين ضلعي ٺاهڻ جي فيصلي کي رد ڪندي چيو ته سڀاڻي ٽين وڳي پريس ڪلب ۾ احتجاجي مظاهرو ڪندو. پاڪستان هائوس ۾ منعقد ٿيندڙ پريس ڪانفرنس کي خطاب ڪندي مصطفيٰ ڪمال چيو ته پ پ سنڌ ۾ نفرت جي اها چڻنگ ٻاري آهي جنهن کي شايد ڪڏهن به وسائي نه سگهجي. اهو ملڪ جي سلامتي جو مسئلو آهي، سنڌ ۾ نسلي بنيادن تي اسان تباهي ۽ بربادي ٿيندي ڏٺي آهي، مون کي ڊپ آهي ته پ پ جي صوبائي حڪومت ڪراچي ۾ نفرت جي باهه ڀڙڪائڻ چاهي ٿي. امير جماعت اسلامي ڪراچي حافظ نعيم الرحمان ڪراچي ۾ ستين ضلعي جي قيام تي پنهنجو رد عمل ڏيندي چيو ته ان سان ڪراچي جي تعمير ۽ ترقي جو ڪوبه تعلق نه آهي، جڏهن به بلدياتي چونڊون اينديون آهن پ پ ان طرح جا حربا استعمال ڪندي آهي جنهن جي پٺيان صرف پوائنٽ اسڪورنگ ۽ سياسي مفادن جو حاصل ڪرڻ مقصد هوندو آهي. جيڪڏهن ڪراچي کي ورهائڻ جو ڪو فائدو ٿي رهيو هجي ها ته پهرين کان ئي ڇهه ضلعا موجود آهن انهن کي ستن ۾ ورهائڻ سان ڪهڙو فرق پوندو. مهاجر قومي موومينٽ پاڪستان جي چيئرمين آفاق احمد ڪراچي ۾ نئين ضلعي جي قيام کي رد ڪندي چيو ته ڪراچي کي ٽڪرن ۾ ورهائڻ سان وڏيرن جي ڪالوني ٺاهڻ جي ڪوشش ڪئي پئي وڃي، جنهن کي ناڪام بڻايو ويندو، مهاجر عوام کي ان جي خلاف اٿي بيهڻو پوندو. هن چيو ته پ پ ڪراچي جي اسٽيڪ هولڊر پارٽي نه آهي ۽ ان کي ان لاءِ اهو ڪوبه حق نٿو پهچي ته هو اهڙي قسم جو آمرانه فيصلو عوام جي مٿان مڙهي. ڪنوينر ايم ڪيو ايم پاڪستان ڊاڪٽر خالد مقبول صديقي پي آءِ بي اسٽيڊيم ۾ بلدياتي نمائندن جي اعزاز ۾ ڏنل رات جي ماني واري دعوت ۾ خطاب ڪندي چيو ته پ پ پنجاهه سال پهرين سنڌ کي ورهائي چڪي هئي جڏهن هنن نعرو هنيو هو ته “ايڌر تم ايڌر هم” ۽ پاڪستان کي ٻه ٽڪرا ڪري ڇڏيو هو. اهڙيءَ ريت گذريل پنجاهه سالن جو تجربو اهو ٻڌائي ٿو ته اسان توهان سان گڏ به نٿا رهي سگهون جيئن اسان هندستان ۾ هندن سان گڏ نه رهي سگهياسين ۽ اسان پنهنجو صوبو ٺاهينداسين. جيڪي ماڻهو سنڌ جي ورهاست جي خلاف آهن ۽ صوبي جي خلاف آهن اهي اصل ۾ غدار آهن ڇا صوبن جو قيام آئين جي شق ۾ شامل ناهي؟ سربراهه تنظيم ايم ڪيو ايم پاڪستان فاروق ستار تنظيم جي ميمبرن جي بحالي واري ڪميٽي سان گڏ ڪراچي جي پريس ڪلب ۾ هنگامي پريس ڪانفرنس ڪئي ۽ چيو ته توهان سڀ گواهه آهيو اڄ وزيراعظم سنڌ سيد مراد علي شاهه جي سربراهي ۾ سنڌ ڪابينا ڪراچي جي وڌيڪ ورهاست ڪرڻ جو فيصلو ڪيو آهي، اسين پنهنجي پاڪستاني ساٿين ۽ ڪراچي جي عوام جي طرفان ان فيصلي کي نامنظور ڪريون ٿا.