سنڌ ۾ ننڍا شهر مڪمل ۽ وڏن شهرن ۾ پاڙي جا دڪان کلندا، ڇنڇر ۽ آچر مڪمل لاڪ ڊائون هوندو

سنڌ حڪومت وفاقي سرڪار جي فيصلي کي قبول ڪندي ننڍن شهرن کي مڪمل طور ۽ وڏن شهرن جي گهٽين ۾ قائم دڪان سومر کان شام 5 وڳي تائين هفتي ۾ 5 ڏينهن کولڻ جو اعلان ڪري ڇڏيو. ڇنڇر ۽ آچر تي مڪمل لاڪ ڊائون هوندو. مخصوص اسپتالن ۾ او پي ڊين کي به کوليندا. وڏي وزير مراد علي شاهه چيو آهي ته قومي سلامتي ۽ سپريم ڪورٽ جي فيصلي سبب وفاق جي فيصلن تي 100 سيڪڙو عمل ڪنداسين. جيڪي ڪاروبار ۽ آفيسون 9 مئي تائين بند هيون اهي بند ئي رهنديون. ڊپارٽمينٽل اسٽور، سئنيمائون ۽ عوامي تفريحي ماڳ به نه کلندا. ان حوالي سان ڪالهه سنڌ اسيمبلي جي آڊيٽوريم ۾ پريس ڪانفرنس ڪندي هن وڌيڪ چيو ته سنڌ ۾ ايندڙ سومر کان لاڪ ڊائون ۾ نرمي ڪئي ويندي. لاڪ ڊائون بابت وفاقي حڪومت سان گڏ هلنداسين. وفاق سان گڏ تعميراتي صنعت جو فيز 2، مخصوص او پي ڊي، ننڍن شهرن کي مڪمل طور ۽ وڏن شهرن ۾ گهٽين اندر قائم ننڍا دڪان کولڻ جو فيصلو ڪيو ويو آهي. ان تي ايندڙ سومر کان عمل ٿيندو. اهي ڪاروبار صبح کان شام 5 وڳي تائين هفتي ۾ 5 ڏينهن کلندا