پنجاب جي ڊوميسائيل واري شخص کي ارسا جي ميمبر بنائڻ ارسا جي قانون جي ڀڃڪڙي آهي: نثار کهڙو

پاڪستان پيپلز پارٽي سنڌ جي صدر نثار کهڙو چيو آهي ته انڊس رور سسٽم اٿارٽي (ارسا) ۾ سنڌ بجاءِ پنجاب جي ماڻهن کي ميمبر بنائڻ خود ارسا جي قانون جي ڀڃڪڙي آهي. هن وڌيڪ چيو ته پي ٽي آءِ جي حڪومت هيٺانهين وارن علائقن جي بين الاقوامي طور مڃيل حقن جي خلاف ورزي ڪندي پنهنجو فيصلو ارسا تي مڙهڻ چاهي ٿي. جڏهن ته اسان ڪورٽن جي عزت ڪريون ٿا ۽ اسان ننڍي صوبي جي پاڻي واري حق ڏيارڻ لاءِ انهن کي اپيل ڪري چڪا آهيون. هن وڌيڪ چيو ته سنڌ کي پنهنجي حق جو گهربل پاڻي نه ملي رهيو آهي جنهن ڪري بدين ۽ ٺٽو ضلعو بنجر بڻجندو پيو وڃي. اهڙي صورتحال ۾ وفاق پاران پنهنجا ماڻهو مقرر ڪرڻ کي ان پاران سنڌ تي پنهنجو فيصلو مڙهڻ سمجهيو ويندو. ان ڪري وفاق کي گهرجي ته اهو ارسا مان وفاق جي ماڻهو کي هٽائي ڇاڪاڻ ته سنڌ ان فيصلي کي برداشت نه ڪندي.