پي ڊي ايم جو اجلاس، ٻارنهن نقاطي ”ميثاق پاڪستان“ تي اتفاق

اپوزيشن اتحاد پاڪستان ڊيموڪريٽڪ موومينٽ (پي ڊي ايم) جي سربراهه اجلاس ۾ 12 نقاطي “ميثاق پاڪستان” تي اتفاق ڪيو ويو. اپوزيشن اتحاد جي سربراهه مولانا فضل الرحمان جي صدارت هيٺ سربراهي اجلاس ٿيو، جنهن ۾ پيپلز پارٽي جي چيئرمين بلاول ڀٽو ۽ بلوچستان نيشنل پارٽي (مينگل) جي سربراهه اختر مينگل وڊيو لنڪ ذريعي شريڪ ٿيا. اجلاس ۾ مريم نواز به شرڪت ڪئي. اجلاس ۾ ملڪي سياسي ۽ معاشي صورتحال ۽ هاڻوڪي گلگت بلتستان چونڊن جو جائزو ورتو ويو، جڏهن ته چارٽر آف پاڪستان تي به صلاح مشورو ڪيو ويو. اپوزيشن اتحاد جي پڌرائي موجب سربراهه اجلاس ۾ 12 نقاطي ميثاق پاڪستان تي اتفاق ڪيو ويو، جنهن موجب وفاقي، اسلامي، جمهوري، پارلياماني آئين پاڪستان جي بالادستي ۽ عملداري ۽ پارليامينٽ جي خود مختياري يقيني هجي. پڌرائي ۾ چيو ويو آهي ته سياست مان اسٽيبلشمينٽ ۽ انٽيليجنس ادارن جي ڪردار جو خاتمو ۽ آزاد عدليا جو قيام يقيني بڻايو وڃي، جڏهن ته آزادانه، غير جانبدارانه ۽ منصفاڻا چونڊن لاءِ سڌارا ۽ انعقاد شامل آهي. ميثاق جمهوريت ۾ عوام جي بنيادي انساني ۽ جمهوري حقن جو تحفظ، صوبن جي حقن ۽ 18 هين ترميم جو تحفظ، مقامي حڪومتن جو موثر نظام، اظهار راءِ ۽ ميڊيا جي آزادي جو دفاع، انتها پسندي ۽ دهشتگردي جو خاتمو ۽ نيشنل ايڪشن پلان تي عملدرآمد جا نقطا شامل آهن. پڌرائي موجب مهانگائي، بيروزگاري ۽ غربت جي خاتمي لاءِ هنگامي معاشي پلان جڏهن ته آئين جي اسلامي شقن جو تحفظ ۽ عمل درآمد به نقطن ۾ شامل آهي.