اڄ کان سامونڊي هوائون بحال، گرمي ختم ٿيڻ جو امڪان

موسميات کاتي پاران چوويهن ڪلاڪن اندر سامونڊي هوائن بحال ٿيڻ جو امڪان ظاهر ڪيو ويو آهي. ڪالهه اربع ڏينهن ڪراچي اندر گرم هوائون هلنديون رهيون، شهر اندر خشڪ ۽ گرم موسم رڪارڊ ڪيو ويو. جڏهن ته اڄ گرمي پد گذريل ڪيترن ئي ڏينهن جي مقابلن ۾ گهٽ رهندو ۽ ايندڙ 24 ڪلاڪن ۾ هوائون مڪمل طور تي بحال ٿي وينديون. اربع ڏينهن ڪراچي جو گرمي پد 43 سينٽي گريڊ رڪارڊ ڪيو ويو. موسميات کاتي جو چوڻ آهي ته ايندڙ 48 ڪلاڪن ۾ سمنڊ جون ڏکڻ اولهه جون هوائون وڌي وينديون ۽ گرمي پد ۾ 3 ڊگري جي گهٽتائي اچي ويندي.