فخرِ پاڪستان اَرفع ڪريم رندهاوا

خدا پاڪ کيس ذهني طور اعلي خوبين سان نوازي ڇڏيو هو ننڍڙي عمر ۾ ئي هن دنيا کي حيرت ۾ وجھي ڇڏيندڙ ڪارناما پڻ ڪري ڏيکاريا جنهنڪري تاريخ کيس فخر پاڪستان طور صدين تائين ياد رکندي. ارفع ڪريم رندهاوا جو جنم 2 فيبروري 1995ع تي فيصل آباد جي هڪ ڳوٺ رام دوالئَ ۾  ٿيو. ننڍپڻ ۾ ئي ارفع ارفع ڳالهائڻ شروع ڪيو سندس ڏاڏي هڪ انٽرويو ۾ ٻڌايو هو ته ارفع ڏيڍ سال جي عمر ۾ ئي ڳالهائڻ شروع ڪيو ۽ پنهنجي ٻاتائپ واري آواز ۾ نعت پڙهڻ جي ڪوشش ڪندي هئي. سندس ڏاڏي مطابق ته ارفع ڪريم ٽن سالن جي عمر ۾ ڪلما ۽ آيت الڪرسي ياد ڪري ورتي هئي. 4 سالن جي عمر ۾ هن ڪمپيوٽر هلائڻ جي ڪوشش ڪئي ۽ گهر ۾ پيل ڪمپيوٽر سان کيڏندي رهندي هئي. کيس ڪمپيوٽر سان لڳاءُ هئڻ ڪري ان ۾ ڪافي مهارت به حاصل ڪيائين. ارفع 2004ع ۾ صرف نوَ سالن جي عمر ۾ مائيڪرو سافٽ سرٽيفائيڊ پروفيشنل (ايم سي پي) بڻجي وئي.

2005ع ۾ مائڪرو سافٽ ڪمپنيءَ جي مالڪ بل گيٽس، ارفع ڪريم سان ڏھ منٽ ملاقات ڪئي ۽ کيس مائيڪرو سافٽ سرٽيفائيڊ ايپليڪيشن جي ڊگري ڏني. 2006ع ۾ بارسلونا ۾ ٽيڪنيڪي ڊولپرز ڪانفرنس ۾ دنيا جي پنج هزار ماڻهن ڏانهن دعوت ناما موڪليا ويا جن ۾ ارفع ڪريم جو نالو پڻ شامل هو ياد رهي ته ان ڪانفرنس ۾ پاڪستان مان صرف ارفع ڪريم کي گهرايو ويو هو. انهيءَ کان علاوه ارفع صرف ڏهن سالن جي عمر ۾ دبئي ۾ هڪ طيارو اڏايو هو کيس ننڍي عمر واري پائليٽ هجڻ جو سرٽيفڪيٽ ڏنو ويو ۽ سندس نالو گنيز بڪ آف ورلڊ رڪارڊ ۾ شامل ڪيو ويو. حڪومت پاڪستان طرفان کيس تمغه حسن ڪارڪردگي ۽ صدارتي ايوارڊ عطا ڪيو ويو. پاڪستان ۾ کيس فاطمه جناح طلائي تمغو، سلام پاڪستان يوٿ ايوارڊ سان پڻ نوازيو ويو. لاهور ۾ هڪ سائنس پارڪ جنهن جو نالو ارفع سافٽ ويئر ٽيڪنالاجي پارڪ رکيو ويو جيڪو ارفع جي نالي سان منسوب ڪيو ويو.  ارفع ڪريم کي 22 ڊسمبر 2011ع تي  گهر ۾ ڪمپيوٽر تي ڪم ڪندي اچانڪ مرگهيءَ جو دورو پيو ۽ ڪرسيءَ تان ڪري پئي، کيس لاهور جي سي ايم ايڇ اسپتال ۾ داخل ڪيو ويو، جتي هوءَ ڪوما ۾ هلي وئي ۽ 14 جنوري 2012ع تي زندگيءَ جي جنگ هارائي وئي.