اختلاف وساري آمريڪا جي بهتري لاءِ گڏجي ڪم ڪنداسين: جوبائيڊن

نئين چونڊيل آمريڪي صدر جوبائيڊن چيو آهي ته اختلاف وساري آمريڪا جي بهتري لاءِ گڏجي ڪم ڪنداسين. آمريڪي رياست ڊيلاوئير جي شهر ولمنگٽن ۾ حامين کي خطاب دوران آمريڪا جي نئين چونڊيل صدر جوبائيڊن جو چوڻ هو ته هي آمريڪا کي گڏ ڪرڻ جو وقت آهي. سياسي وابستگي کان مٿانهون ٿي ملڪ جي لاءِ ڪم ڪري سگهجي ٿو. ان ڪري اختلاف وساري آمريڪا جي لاءِ گڏجي ڪم ڪنداسين. نئين چونڊيل آمريڪي صدر جوبائيڊن چيو ته آمريڪي عوام تبديلي جي لاءِ ووٽ ڏنو. ڪورونا جي وبا، خراب معيشت ۽ عوامي فلاح جا منصوبا اوليت جي بنياد تي هوندا. جڏهن ته ڪورونا تي قابو ڪرڻ جي لاءِ ڊاڪٽرن ۽ سائنسدانن تي ٻڌل ٽيم ٺاهي وئي آهي. جوبائيڊن چيو ته آمريڪي عوام فيصلو ٻڌائي ڇڏيو آهي عوام آمريڪي تاريخ جا سڀني کان وڌيڪ 7 ڪروڙ 40 لک ووٽ ڏنا جنهن تي مان سندن ٿورائتو آهيان. واضح رهي ته آمريڪي صدر چونڊن ۾ سخت مقابلي کانپوءِ ڊيمو ڪريٽ اميدوار جوبائيڊن آخرڪار ڊونلڊ ٽرمپ کي شڪست ڏئي آمريڪا جو 46 هون صدر چونڊجي ويو آهي.