نئون سال: هوائي فائرنگ ڪندڙن خلاف قتل جي ارادي جا ڪيس داخل ٿيندا

ڪراچي ۾ نئين سال جي موقعي تي هوائي فائرنگ ڪندڙن خلاف قتل جي ارادي جا ڪيس داخل ڪرڻ جو فيصلو ڪيو ويو آهي، ڪراچي ۾ نئين سال جي جشن جي موقعي تي شهر  ۾ سخت حفاظتي انتظام ڪيا ويا آهن ۽ ان سلسلي ۾ ڏکڻ ضلعي ۾ 2250 پوليس اهلڪار به مقرر ڪيا ويا آهن. ايس ايس پي ڏکڻ موجب ضلعي ۾ سخت سڪيورٽي قدمن کي حتمي شڪل ڏني وئي آهي ۽ ان سلسلي ۾ گهڻا انتظام ڪلفٽن ۽ ڊفينس سب ڊويزنن ۾ ڪيا ويا آهن، پوليس سڪيورٽي کي مجموعي طور تي 9 سيڪٽرن تي ٺاهيو ويو آهي. سمنڊ وڃڻ وارن رستن تي هڪ هزار 557 آفيسر ۽ اهلڪار ڊيوٽي جا فرض سرانجام ڏيندا، ايس ايس پي ڏکڻ جو چوڻ آهي ته هوائي فائرنگ ڪندڙ عنصرن خلاف سخت ڪارروائي ڪئي ويندي ۽ مٿن قتل جي ارادي سميت ٻين قلمن تحت ڪيس داخل ڪيا ويندا.